ثاني العيد

مساء ثاني عيد الأضحى ..

أمس كان عيدنا واليوم مادري عيد مين, لكن يبدو أنه يوم بيتوتي !

نفسي أخرج وأتمشى وكافي ودنيا

ولكن.. لا أنيس ولا ونيس هع

هيدر المدونة

كتبت كثير اليوم.. بس ماعليه أنا حرة.
زي ما كتبت قبل إني إحس إني مثبطة وماحقدر أبنيلي مستقبل
أشوف هيدر المدونة "قف على ناصية الحلم وقاتل" يجيني شي يحمسني, وبعدها على طول تجيني أفكار وأشياء دبل تهدّني.

نفسي أقول بس ما أقدر

لما نفسي أتكلم وأفضفض عن شخص بحياتي بس ما أقدر لأني حتعرض للنقد

وحصير الإنسانة الوصخة القليلة الأدب الخالية من الأخلاق والإحترام و المتعرية من الدين و بلا بلا بلا

لكن حتكلم عن الصفات بدون ذكر الشخص..

حقيقي ما أقدر أفهم الناس المتناقضة اللي تناقضها مستفز ومؤثر على حياتي ومستقبلي 

ودنيتي كلها كمان.. مؤثر بشكل كبير كمان مو شوي 

شي محبط وكل ما أبني أفكار ومستقبل فبالي, يحطلي هالشخص ألف حاجز

نفسي أكون أقدر أتكلم أكثر.. بس ماقدر

شي حقيقي؟

مرحبًا..

نفسي أتذكر مدونتي دايمًا وأكتب فيها أشياء بشكل شبه يومي, بس مادري ياخي مره أنساها !

أمس صارلي موقف مره زعلني خلاني أنام وأنا أصيح ويوم صحيت عيني مفقعة بتنفجر

وللآن وهي مفقعة وأنا لي فترة صاحية.. المهم

الموقف خلاني أفكر إني قاعدة أدور شي حقيقي فحياتي؟ قاعدة أفكر وأفكر 

ايش فيه شي حقيقي بحياتي؟ حب؟ صداقة؟ عايلة؟

ايش فيه؟ احس كل شي كذبة مع انه حقيقي

والإحساس مره مو حلو ! إحساس وِحِش ......

بس أتوقع لما تروح نوبة الزعل اللي معايا حيرجع كل شي طبيعي إن شاء الله

+ شي ثاني

اكتشفت سبب العقدة اللي عندي عن موضوع رجال وحريم وأشياء تفرقية

عرفت مين سببلي هذي العقدة , وما أفضل أقول مين لكن متأكدة إني لما أقرا كلامي هذا بأي وقت لو بعد قرن حتى حعرف أنا كنت أقصد مين .. لأنه ذا شي كان مفروض أكتشفه من زمان بس موقف أمس بينلي وفتّح عيني 

ننتقل من جو الكآبة شوي

اليوم حفلة وفاء مع صحباتها "حفلة التخرج" ماني عارفة إذا بروح ولا لا 

لكن نفسي أروح أكون معاها وأفرّحها.. إن شاء الله ألقى اللبس المناسب وإن شاء الله هي تنبسط ♥️♥️♥️.

bye